Stóðhesturinn Akkur frá Brautarholti var felldur s.l. laugardag eftir að hafa veikst alvarlega miðvikudaginn 2. september. Þrátt fyrir skjót og góð viðbrögð dýralækna sem gerðu allt til að reyna bjarga hestinum var ekki annað hægt en að fella þennan mikla höfðingja.    
  

   

Þetta kemur fram á http://www.hrima.is/, heimasíðu Tryggva Björnssonar á Blönduósi en hann var eigandi Akks ásamt Ásmundi Ingvasyni.

Tryggvi segir að ágætlega hafi litið út með bata en svo fór að lokum að honum hrakaði mjög síðustu daga og því var ákveðið að fella hestinn. "Það er mjög sorglegt að horfa á eftir þessum mikla höfðingja þar sem hann hefur veitt manni mikla og góða kennslu og árangur frá því að við eignuðumst hann í mars 2007", segir Tryggvi en þeir hafa verið sigursælir á keppnisvellinum i gegnum tíðina.

Akkur hafði hlotið í kynbótadóm 8,23 fyrir sköpulag, 8,80 fyrir hæfileika og 8,57 í aðaleinkun

Sigurvegari í B. flokk hjá Þyt 2007 og 2009
Sigraði B. flokk á Ístölti Austurlands 2008
Þriðja sæti í B. flokk á Landsmóti 2008
Í úrslitum í B. flokk á Metamóti hjá Andvara 2007 og 2008
Fjórða sæti í B. flokk á FM 2009

Stóðsmölun og réttir í A-Húnavatnssýslu

Dagana 19. og 20. september verður mikið fjör í Austur Húnavatnssýslu,
stóðsmölun á Laxárdal og réttir í Skrapatungurétt.
 Gestir eiga þess kost að slást í för með gangnamönnum á Laxárdal og upplifa alvöru þjóðlegt ævintýri.
 Þátttakendur leigja hesta hjá heimamönnum eða mæta með sína eigin hesta. Stóðhrossin verða rekin til byggða á laugardeginum 19. september.

Lagt er af stað frá Strjúgsstöðum í Langadal kl:10:00
og síðan riðið sem leið liggur um Strjúgsskarð og norður Laxárdal.
 Athugið að aðstaða til að geyma hross nóttina fyrir smölunardag er við sandnámu við Strjúgsstaði  (norðari afleggjari). 
Þátttakendur eru beðnir að virða að ekki er leyfilegt að
 reka laus reiðhross í stóðsmöluninni. 

Við Kirkjuskarðsrétt á Laxárdal er hópurinn um kl 14. Þar hvíla hestar og menn og bíða eftir gangamönnum, fá sér að eta og drekka eftir þörfum.
Veitingar verða seldar á staðnum.

Ráðgert er að leggja af stað kl. 16 frá Kirkjuskarði.
 (eða 1/2 -1 klst eftir að gangnamenn koma niður)
Þaðan er riðið norður í Skrapatungrétt sem er ein myndarlegasta stóðrétt landsins.
Gestir og heimamenn heillast ávallt af tignarlegu stóðinu. 
Ferðamannafjallkóngur líkt og í fyrri ár verður Valgarður Hilmarsson forseti bæjarstjórnar Blönduóss. Hann er heimavanur á þessum slóðum og mun sjá um fararstjórn og leiðsögn ferðamanna í stóðsmöluninni.

Fyrir þá sem heldur vilja koma á bíl til að fylgjast með gangnamönnum og réttarstörfum, er rétt að benda á að Skrapatungurétt er í um 15 mín. akstursfjarlægð frá Blönduósi en fram að Kirkjuskarðsrétt er aksturstími um 40 mín.

Veitingar fyrir svanga smala og aðra gesti á Pottinum og Pönnunni Blönduósi. 

Á laugardagskvöldinu leikur besta stóðréttarhljómsveit landsins Paparnir fyrir dansi í Félagsheimilinu Blönduósi. Húsið opnar kl. 22:30. Barinn opinn. 18 ára aldurstakmark.

          Á sunnudagsmorgun hefjast réttarhöld í Skrapatungurétt um kl:11. 
       Bændur ganga í sundur hross sín og reka þau svo í lok dags til síns heima.

Stóðréttarhelgi Skrapatunguréttar er hátíð heimamanna og ferðafólks
 þar sem er spilað, sungið og skemmt sér að sið Íslendinga.

 
Allir gestir eru hjartanlega velkomnir.
Nánari upplýsingar um þjónustu hjá ferðamannafjallkóngi í
síma:      893 2059 eða í netfangi [email protected] 

                                                                                                                                                      heimild: huni.is