Félagsmót og úrtaka.

17. júní verður félagsmót og úrtaka vegna landsmóts. Kostir og gallar fylgja þessari dagsetningu en þetta varð niðurstaðan og vonandi að það gangi fyrir sem allra flesta og viljum við hvetja alla til að vera með hvort sem stefnt er á landsmót eða ekki.

Reiðmaðurinn

Auglýst hefur verið að Reiðmaðurinn II verði í boði í Reiðhöllinni okkar. Allir þeir sem kunna að hafa áhuga á Reiðmanninum I eru beðnir að setja sig í samband við Hödda á messenger, í síma 8940081 eða á förnum vegi og reynist fullnægjandi áhugi munum við leita eftir því að boðið verði upp á námskeiðið aftur.

Æskulýðssýningin

Á sumardaginn fyrsta var árleg æskulýðssýning þar sem við fögnuðum vorinu og glöddumst yfir vetrarstarfinu og sáum krakkana uppskera eftir æfingar og vinnu vetrarins. Sýningin tókst vel í alla staði og fjöldi fólks kom að fylgjast með. Gaman væri ef við gætum náð saman nokkrum myndum til að varðveita inn á neisti.net en myndasafnið þar er ómetanleg heimild um starf félagsins. Um 40 þátttakendur voru á námskeiðum vetrarins og þökkum við þeim kærlega fyrir og reiðkennurunum okkar þeim Guðrúnu Rut, Lilju Mariu og Ásdísi Freyju færum við sérstakar þakkir.

Í fullorðinsflokkum er keppt í V1 þar sem er einn inn á í einu og knapi ræður röð gangtegunda. Farinn er einn hringur á hægu tölti, einn hringur á greiðu, einn hringur á brokki og einn á stökki og hálfur á feti, og röð gangtegunda og upp á hvora hönd er riðið ræður knapi.  Skráning á sportfeng. 

Sunnudaginn 8. Mars var annað mótið í mótaröð Besta Bóndans og Neista haldið á Hnjúkatjörn.

Keppt var í Tölti T3 í fullorðinsflokki (1. og 2. flokkur) og T3 í barnaflokk og bæjarkeppni með frjálsri aðferð, á frábærum ís í lítilsháttar snjómuggu, éljum, súld og hundslappadrífu til skiptis.

Mótið fór hið besta fram og ekki annað að sjá en keppendur og áhorfendur hafi skemmt sér hið besta.

Úrslit

Tölt T3 – barnaflokkur

A úrslit

1. Katrín Sara Reynisdóttir         Óríon frá Tvennu                            Neisti              4,20
2. Viktoría Máney Guðjónsd.     Svaðilfari frá Blöndubakka            Neisti              4,00

Tölt T3 – fullorðinsflokkur 2. Flokkur

A úrslit

1. Hörður Ríkharðsson                Þrá frá Þingeyrum                  Neisti              6,50
2. Harpa Katrín Sigurðardóttir   Dugur frá Hnjúki                     Neisti              5,80
3. Annukka Turturivuori             Haukur frá Sveinsstöðum      Neisti              5,00
4. Annabell Skjoedt Hansen       Ofríkur frá Stóradal                Neisti              4,70
5. Maríanna Gestsdóttir              Dropi frá Hnjúki                      Neisti              3,50

Forkeppni

1. Harpa Katrín Sigurðardóttir   Dugur frá Hnjúki                     Neisti              6,20
2. Hörður Ríkharðsson                Þrá frá Þingeyrum                  Neisti              6,00
3. Annabell Skjoedt Hansen       Alvör frá Stóradal                   Neisti              5,00
4. Annabell Skjoedt Hansen       Ofríkur frá Stóradal                Neisti              4,80
5. Annukka Turturivuori             Haukur frá Sveinsstöðum      Neisti              4,80
6. Maríanna Gestsdóttir              Dropi frá Hnjúki                     Neisti              4,30
7. Þorlákur S. Sveinsson             Laufey frá Skagaströnd         Snarfari           4,30
8. Sara Kjær Boenlykke             Glæsir frá Hæli                          Neisti              4,2

Tölt T3 – fullorðinsflokkur 1. Flokkur

A úrslit

1. Jón Kristófer Sigmarsson       Rós frá Blönduósi                      Neisti             7,67
2. Eline Schriver                           Melódía frá Hofi                        Neisti              6,17
3. Guðmundur Sigfússon           Ólga frá Blönduósi                    Neisti              6,00
4. Ægir Sigurgeirsson                 Veisla frá Stekkjardal                 Neisti              4,83
5. Guðjón Gunnarsson               Kúla frá Skeggsstöðum             Fákur              4,50

Forkeppni

1. Jón Kristófer Sigmarsson       Rós frá Blönduósi                   Neisti              7,20
2. Eline Schriver                           Melódía frá Hofi                     Neisti              6,00
3. Guðmundur Sigfússon           Ólga frá Blönduósi                 Neisti              5,50
4. Jón Kristófer Sigmarsson       Púma frá Grænuhlíð              Neisti              4,80
5. Ægir Sigurgeirsson                 Veisla frá Stekkjardal              Neisti              4,70
6. Guðjón Gunnarsson               Kúla frá Skeggsstöðum          Fákur               4,70

Bæjarkeppni – fjórar ferðir - frjáls aðferð

A úrslit

1. Jón Kristófer Sigmarsson        Jóndís frá Hæli                        Neisti
2. Katrín Sara Reynisdóttir         Óríon frá Tvennu                    Neisti
3. Guðmundur Sigfússon            Ólga frá Blönduósi                 Neisti
4. Ægir Sigurgeirsson                   Burkni frá Stekkjardal             Neisti
5. Harpa Katrín Sigurðardóttir   Dugur frá Hnjúki                    Neisti

Þátttakendur eftir rásröð

Sara Kjær Boenlykke                           Gleði frá Hæli                         Neisti

Katrín Sara Reynisdóttir                     Óríon frá Tvennu                    Neisti

Þorlákur S. Sveinsson                         Laufey frá Skagaströnd            Snarfari

Harpa Katrín Sigurðardóttir               Dugur frá Hnjúki                    Neisti

Guðjón Gunnarsson                            Kúla frá Skeggsstöðum            Fákur

Ægir Sigurgeirsson                               Burkni frá Stekkjardal             Neisti

Þórey Helga Sigurbjörnsdóttir            Bersi frá Stóra-Búrfelli            Neisti

Jón Kristófer Sigmarsson                     Jóndís frá Hæli                        Neisti

Maríanna Gestsdóttir                          Dama frá Hnjúki                     Neisti

Pétur Ari Pétursson                             Lygna frá Geitaskarði             Neisti

ÍSMÓT Á HNJÚKATJÖRN

Mótaröð Besta bóndans og hestamannafélagsins Neista heldur áfram og nú er komið að ísmóti þann 8. mars kl 13.00

Keppt verður í tölti. Barnaflokk, Unglingaflokk, 2. flokk og1. flokk

Riðnar eru 4 ferðir, 1 hægt tölt, 2 hraðabreytingar og ein ferð greitt tölt. Stjórnað af þul

Opin bæjarkeppni verður einnig, þar eru 4 ferðir sem fólki er frjálst að sýna þá gangtegund sem það vill. (Þið skráið ykkur þá í C1 flokkur gæðinga á sportfeng)

Skráning fer fram á sportfeng og er SÍÐASTI skráningardagur föstudagurinn 6. mars. og það má alveg skrá sig fyrir þann dag EKKI VERÐUR TEKIÐ VIÐ SKRÁNINGUM EFTIR FÖSTUDAGINN 6. MARS.

Dagskrá

13.00 Barnaflokkur

úrslit barnaflokk

Unglingaflokkur

úrslit unglingaflokk

2 flokkur

úrslit 2 flokkur

1 flokkur

úrslit 1 flokkur

10 mínútna hlé

Bæjarkeppni

úrslit bæjarkeppni

Aðalfundur - Námskeið -  Ísmót - Reiðhallargjöld

Aðalfundur Hestamannafélagsins Neista verður haldinn í Reiðhöllinni fimmtudagskvöldið 19. febrúar kl. 19:30.  Venjuleg aðalfundarstörf.

Laugardag 21. og sunnudag 22. febrúar er höllinn mikið upptekin vegna námskeiðs.

Stefnt er að ísmóti helgina 7. - 8. mars.  Nánar auglýst síðar.

Allir sem eiga eftir að borga reiðhallargjöld hvattir til að gera það sem fyrst, 27.000 kr. inn á 307-26-100017  kt. 680800-2860.

Gæðingatölt  -  Gæðingatölt

Mótaröð Besta bóndans og Hestamannafélagsins Neista byrjar laugardaginn 14. febrúar kl 13.00.

Keppt verður í Gæðingatölti. 1 flokk, 2. flokk. Barnaflokk og unglingaflokk.

2 inná í einu, stjórnað af þul. Einn hringur hægt tölt þá snúið við og einn hringur frjáls ferð.

Ef lítil skráning er í flokka þá munum við sameina flokka ef þarf.

Skráning fer fram á sportfeng og síðasti skráningardagur er fimmtudagurinn 12. febrúar.

Pollar þurfa ekki að skrá sig, bara mæta og hafa gaman.

Dagskrá

13.00 pollar

Barnaflokkur forkeppni

Úrslit Barnaflokk

Unglingaflokkur forkeppni

Unglingar úrslit

2.flokkur forkeppni

2.flokkur úrslit

1.flokkur forkeppni

1.Flokkur úrslit

Reiðhallargjöld   Keppni    Reiðmaður    Námskeið Hörður í Gröf. 

Ákveðið hefur verið að fullt reiðhallargjald sé 27.000 kr. fyrir 2026. Yngri en 18 ára greiða hálft gjald eða 13.500 kr. séu þeir án foreldra/forráðamanna að nota reiðhöllina.  Stakir tímar í reiðhöll kosta 2.500 kr. en ósk eftir þeim verður að berast áður en í tíma er haldið, tilkynnist Hödda eða Sigga í síma, messenger, sms, tölvupósti eða einhvern veginn. 

Sé gjald greitt í síðasta lagi 1. febrúar er fullt gjald 26.000 kr og gjald fyrir yngri 13.000 kr. 

Reiðmannshelgi er í höllinni 6.- 8. febrúar. 

Stefnt er að fyrsta móti vetrarins laugardaginn 14. febrúar. 

Auglýstir hafa verið einkatímar með Herði Óla Sæmundssyni 21. og 22. febrúar og verður höllin lokuð þá tíma sem kunna að verða.

Folaldasýning     Reiðhallargjöld       Keppni      Námskeið     Reiðmaður.

Fyrirhugað er að halda folaldasýningu í Reiðhollinni Arnargerði laugardaginn 24. janúar kl. 13.00

Hinn eini sanni Eyþór Einarsson kemur og dæmir.

Keppt verður í flokki hryssu- og hestfolalda.

Einnig verða ógeltir ungfolar til sýnis fæddir árin 2023 og 2024

Skráningarfrestur er til og með fimmtudagsins 22. janúar.  Skráningargjald á folald er 2.000 kr. Fram þarf að koma eigandi, nafn, uppruni, litur, kyn, móðir og faðir.

Skráningar hjá Þóreyju Helgu á netfangið [email protected]

Reiðhallargjaldið 2026 er 26.000 kr. fyrir alla þá sem leggja inn á 307-26-100017 kt. 680800-2860 til og með 1. febrúar.  Eftir það verða sendir greiðsluseðlar með 27.000 kr. gjaldi.  

Mótanefnd þarf skóhorn til að koma fyrir mótum í þéttskipaðri dagskrá en föstudaginn 13. febrúar er fyrirhugað að storka örlögunum og hafa gæðingatölt í Reiðhöllinni. Nánar auglýst síðar. 

Námskeiðin eru kominn á fullt og eru á mánudögum frá kl. 16:00 - 20:00 og á miðvikudögum frá kl. 17:30 til 21:00. Pollar hefja svo leik á sunnudögum í febrúar.

Reiðmannshelgarnar eru 6. - 8. febrúar,  27. feb. - 1. mars., 17. - 19. apríl. Þau hefja leik um kl. 15:00 á föstudögum og eru fram að smalahundum á sunnudegi kl. 18:00.  

Smalahundar eru alla sunnudaga frá kl. 18:00 og fram eftir kvöldi. 

Um næstu helgi 9. - 11. janúar er Reiðmannshelgi í Reiðhöllinni og hún því upptekin. Einnig eru hundaþjálfunartímarnir byrjaðir á sunnudögum kl. 18:00. Mánudaginn 12. janúar hefjast svo námskeið í hefðbundnum stíl og verða væntanlega á mánudögum og miðvikudögum og síðar einnig á sunnudögum.

Vinnudagur  -  vinnustund

Laugardaginn 27. desember ætlar stjórn að mæta upp í Reiðhöll og sinna nokkrum verkefnum. M.a. þarf að laga stíuhlera í hesthúsi, glugga þar, liðka þarf hurðir og svo þarf að vinna að því að búa til betri lofthringrás fyrir nýja kyndikerfið. Grípa má í kúst og sópa palla og kannski má vökva gólfið og svo þarf kannski aðeins að líta á salinn uppi ofl. smálegt. Mögulega þarf að fara niður í bæ og sækja hluti sem okkur hafa verið gefnir og kannski væri gott að setja upp fleiri ljós.  Þeir sem hafa tök á að láta sjá sig mega láta stjórnarmenn vita eða bara birtast á svæðinu um birtingu eða þegar hentar. 

Stjórnin. 

Eitt og annað.

Við minnum á að 20.desember rennur út frestur til að skrá sig á námskeið á vegum Æskulýðsnefndar Neista á vorönninni. Skráningin fer fram í gegnum Abler.

-Bendum á að nú eru komnir leigjendur að hesthúsinu í reiðhöllinni og hvetjum alla til að taka tillit til þeirra og ekki ganga í gegnum kaffistofuna nema brýna nauðsyn beri til.

-Nú erum við búin að keyra nýja kyndikerfið í fimm daga og erum enn að læra á það auk þess sem frekari framkvæmdir eru nauðsynlegar. Mikilvægt er að engin sé að skilja hurðir eftir opnar sem eru lokaðar þegar komið er að þeim og loki ekki hurðum sem eiga að vera opnar. Einnig er mikilvægt að ekki sé átt við krana á neinum ofnum né gluggar opnaðir. Ef fólki finnst eitthvað athugavert eða skrítið í þessu sambandi er best að hringja í Hödda í 8940081 og fá upplýsingar eða hann kemur og reynir að lagfæra eða greiða úr. 

-Því miður hefur ekki tekist nógu vel til með speglana fínu og er unnið að því máli hörðum höndum. 

Æskulýðsstarf

Loksins loksins,  betra seint en aldrei,  það er komið skráningar form fyrir reiðnámskeið vetrarins inná abler.  Farið inná sport abler,  finnið hestamannafélagið Neista og þá koma upp þau reiðnámskeið sem verða í boði frá miðjum janúar og til apríl loka.  Það verður boðið uppá polla 3x í mánuði,  7-14 ára 1xi í viku, unglingar og ungmenni 1x í viku og námskeið fyrir fullorðna 1x í viku. Allar helstu upplýsingar um verð og fyrirkomulag eiga að vera inná sport abler, nema tímasetningar,  þær koma að skráningu lokinni.

Ef eitthvað er óljóst endilega hafið samband við æskulýðsnefnd.

Biðst afsökunar á þessari seinkun,  Heiða Haralds formaður æskulýðsnefndar

Um síðustu helgi voru veittar viðurkenningar á uppskeruhátíð búgreinafélaganna. Viðurkenningar hlutu Sunna Margrét Ólafsdóttir sem knapi ársins og Selma Erludóttir sem sjálfboðaliði ársins.

Knapi ársins

Sunna Margrét Ólafsdóttir.

Sunna Margrét keppti í íþróttakeppni og gæðingakeppni á Toppi frá Litlu Reykjum með ágætis árangri á árinu sem er að líða. M.a. keppti hún í Skagfirsku mótaröðinni, WR móti Léttis, Félagsmóti Neista og Fjórðungsmóti í Borgarnesi. Á fjórðungsmótinu reið hún B-úrslit og var aukastöfum frá því að komast í A-úrslit. 

Sunna stundar nám á hestabraut í FNV og sækist námið vel. 

Sunna er prúður en ákveðinn knapi sem er sjálfri sér og félaginu til sóma í hvívetna og óskum við henni til hamingju með árangur sinn. 

Sjálfboðaliði ársins hjá Neista.

Selma Erludóttir

Selma hefur um áratugaskeið verið boðin og búin til ýmissa starfa á vegum hestamennskunar í Húnaþingi. Minnsta kosti má rekja þá sögu aftur til ársins1991 en þá annaðist hún gerð mótaskrár auk annars. Um árabil var hún í stjórn Neista og alla jafna sem gjaldkeri. Hún hefur unnið að öllu því sem þessu starfi fylgir, mótahaldi, sýningarhaldi, æskulýðsstarfi, 17. júní hátíðarhöldum, fjórðungsmótum, félagshesthúsi og landsmótum, þrifum á reiðhöll og guð má vita ekki  hverju. Allra mest eigum við þó henni að þakka að halda utan um bókhald, reikninga, ársreikninga, sýningarskráagerð og skýrsluhald ýmiss konar í fjölda ára. Viljum við þakka elsku Selmu kærlega fyrir allt þetta starf og hlökkum jafnframt til áframhaldandi samstarfs. 

Æskulýðsstarf - fundur

Nú er veturinn genginn í garð í öllu sínu veldi og þá er ekki úr vegi að fá sér heita súpu og nýbakað brauð og það er akkúrat það sem æskulýðsnefnd Neista ætlar að gera mánudaginn 3. Nóvember kl 18. Og ekki bara það heldur ætlum við að skiptast á hugmyndum um hvað væri hægt að gera í vetur. Við hvetjum alla þá sem áhuga hafa á að kynna sér og/eða taka þátt í æskulýðsstarfinu með okkur að koma í salinn uppi í reiðhöllinni og njóta með okkur. Endilega látið berast sem víðast og ef einhverjir sjá sér ekki fært að mæta en langar að koma einhverju á framfæri má gjarnan senda tölvupóst á netfangið [email protected]

Kveðja nefndin.

Frá reiðveganefnd

Þann 09.10 var góðum áfanga náð en þá var lokið við að gera hrossagerði við Skagastrandarveg sunnan Ennisvegar. Þetta er síðasta verkið í verkefni sem staðið hefur í nokkur ár en það var að afmarka reiðveg frá Blönduósi til Skagastrandar. Þetta hefur potast áfram enda margir sem hafa lagt hönd á plóg enda eru handtökin mörg. Búið er að girða nær alla leiðina á milli þessara þéttbýlisstaða en ekki var girt með þeirri leið sem farið er við Ytri-Laxá, það er niður að ósnum en þar er farið yfir.  Þessi framkvæmd er mikil bót fyrir þá er kjósa að ferðast á hrossum og verður vonandi til að auka samskipti milli hestafólks á svæðinu.  Verkefnið var samstarfsverkefni hestamannafélaganna Snarfara og Neista og væri það vel til fundið að félögin beittu sér fyrir því að farin verði hópreið þessa leið þegar klaki er farinn úr jörð og færið orðið gott.