Færslur: 2010 September

28.09.2010 11:51

Stóðréttir í Víðidal


Nú eru aðeins örfáir dagar í

stóðsmölun og stóðréttir í Víðidalstungurétt í Víðidal.

Hátíðin hefst  kl 17.30 á fimmtudaginn með sölusýningu á Gauksmýri.

Föstudaginn 1. okt. er stóðinu smalað til byggða.

Gestir sem ætla að taka þátt í smöluninni fara af stað frá Hrappstöðum um kl. 10.

Þeir sem ætla  að vestan mæta í Valdarásrétt um hádegi.

Um kvöldið er kjörið að fá sér kjötsúpu í Víðigerði

eða hjá þeim heiðurshjónum Siggu og Jóa á Gauksmýri.

Á laugardag verður grillhlaðborð á Gauksmýri og vissara að panta í síma 4512927.

Laugardaginn 2. okt. er stóðið rekið til réttar stundvíslega kl. 10

og hefjast þá réttarstörf.

Í réttinni stendur Kvenfélagið Freyja fyrir happdrætti

og fæst miði með því að versla veitingar af félaginu .

Aðalvinningurinn er folald !!

Í Víðidalstungurétt mjá jafnan sjá fjölda efnilegra unghrossa.

Búst má við uppboði á völdum hrossum þar sem hægt verður að

nálgast draumahestinn á viðráðanlegu verði.

Á laugardagskvöld er dansleikur í Víðihlíð þar sem hljómsveit Geirmundar

heldur uppi sveiflunni eins og honum einum er lagið.

Verið velkomin í Víðidal.


26.09.2010 09:46

Hrossin, hóstinn og haustið


Nú haustar óðum og dagarnir kólna. Hestar landsins eru flestir í góðum holdum eftir mikið sprettusumar og litla hreyfingu vegna smitandi hósta sem komið hefur illa bæði við hesta og hestaeigendur. Skýrt er að streptokokkar eru að valda sjúkdómnum en ekki veira og er endursmit mögulegt. Með kólnandi veðri þarf að huga að heilsufari hrossana.

Sem betur fer mun skýringin á hóstanum vera fundin, sýkillinn Streptococcus zooepidemicus sem hingað til hefur verið skaðlítill meðlimur í eðlilegri örveruflóru hrossa en hefur nú tekið á sig hættulegri mynd. Í upphafi sýkingar er erfitt að finna hann, en þegar nefrennslið fer að verða hvít- eða grænleitt er það merki þess að sýkillinn hefur náð að fjölga sér verulega. Kjörlendi sýkilsins er á slímhúðinni í öndunarvegi, sýklalyf hafa því yfirleitt takmörkuð áhrif nema þegar sýkingin hefur náð sér svo fyrir að eitlar stækki og líkamshiti hækki. Þá er að sjálfsögðu rétt að kalla til dýralækni.

Lengi vel var leitað að veiru sem mögulegum orsakavaldi hóstans en vel þekkt er að streptokokkasýkingar fylgja oft í kjölfar veirusýkinga, bæði hjá mönnum og dýrum.  Nú hafa veirur verið nánast útilokaðar sem orsök þessa sjúkdóms. Sömuleiðis hefur svipuðum sjúkdómseinkennum verið lýst erlendis þar sem S. zooepidemicus  er orsökin, afbrigði sýkilsins virðast sýna breytta hegðun.

Því er rétt að beina athyglinni frá veirukenningunni og þeim meðferðarúrræðum sem bent hefur verið á í því samhengi. Mikilvægt er sömuleiðis að koma faglegum og réttum skilaboðum til kaupenda erlendis, en útflutningur er nýhafinn eftir margra mánaða hlé. Órökstudd umræða um veirur getur haft mjög skaðleg áhrif á erlenda markaði.

Töluvert hefur verið rætt um mögulegt endursmit, en líkaminn myndar yfirleitt ekki langvarandi ónæmi gegn streptokokkum, það þekkja þeir sem hafa fengið ítrekaðar sýkingar í háls af völdum streptokokka. Algengasta orsök endursmits er að sýkt hross kemur inn í hjörðina, þá sést smitið í heimahrossunum 2- 4 vikum seinna.

Hestaeigendur hafa eðlilega áhyggjur af kaldari tíð og heilsufari hrossana í vetur. Best er fyrir hrossin að ganga úti, að þau fari vel feit inn í veturinn en fitan er þeim nauðsynleg vörn gegn kulda, að þau hafi aðgengi að skjóli, góðri beit, vatni og steinefnum. Ormahreinsanir eru mikilvægar til að viðhalda heilbrigði.
Fylgjast skal sérstaklega vel með folöldum sem virðast nú afar móttækileg fyrir sýkingunni. Þegar hryssurnar bíta undan sér í vetur þarf  að huga vel að þessum hópi. Mikilvægt er að nýjum hrossum sé ekki bætt í stóðið nema að brýna nauðsyn beri til og þá sé fylgst vel með stóðinu næstu mánuði.

Að lokum skal minnt á að Keldur kryfja nú hross eigendum að kostnaðarlausu, ef líkur eru á að hóstinn hafi orðið hrossinu að fjörtjóni. Hestaeigendur eru því hvattir til að láta dýralækni  vita um grunsamleg tilvik, með því móti leggja þeir sitt af mörkum til aukinnar þekkingar á sjúkdóminum.

Ítarefni

    Upplýsingar um smitandi hósta í hrossum

/mast.is

Hestafrettir


23.09.2010 21:47

Hestamenn hugi vel að hesthúsum sínum um helgina


Laufskálarétt í Skagafirði fer fram um helgina. Að því tilefni vill Lögreglan á Blönduósi minna hestamenn í Húnaþingi á að huga vel að hesthúsum sínum. Reynslan hefur sýnt að síðastliðin ár hefur verið brotist inn í hesthús í Húnaþingi og verðmætum stolið á sama tíma og Laufskálarétt er haldin. Fjöldi gesta sækir Skagafjörð heim þessa helgina og búast má við mikilli umferð um Húnaþing.

Húnahornið

16.09.2010 14:20

Opin fundur á Blönduósi um stöðu smitandi hósta hjá hrossum


LH, FHB og FT boða sameiginlega til fundar um stöðu smitandi hósta hjá hrossum á Blönduósi í Sjálfstæðishúsinu þriðjudaginn 21.september kl.20:30.


Sigríður Björnsdóttir dýralæknir hrossasjúkdóma hjá MAST, Eggert Gunnarsson bakteríufræðingur og Vilhjálmur Svansson veirufræðingur munu mæta og fara yfir stöðuna með fundargestum.

Fundurinn er öllum opinn.

Hestamannafélagið Neisti og Samtök Hrossabænda í A.-Hún. hvetja alla hrossaræktendur og hrossaeigendur til þess að mæta á fundinn.



16.09.2010 14:00

Sölusýning á Gauksmýri



Sölusýning verður haldin á Gauksmýri fimmtudaginn 30. september kl 17.30 í tengslum við Víðidalstungurétt.

 

Fimmtudaginn 23.sept verður boðið uppá videoupptöku á þeim hrossum sem menn hafa í boði, mun videoupptakan fara fram á vallarsvæði Þyts upp í Kirkjuhvammi. Þar fá allir video af sínum hesti og við munum setja videoin inn á youtube.com fyrir þá sem það vilja.

En video af öllum hrossunum verður sýnt á Gauksmýri á fimmtudeginum og í Víðidalstungurétt á laugardeginum.

 

Þeir sem vilja láta video af hrossum og taka þátt í sölusýningu er bent á að hafa samband við Tryggva í síma 898-1057 eða senda póst hrima@hrima.is í síðasta lagi þriðjudaginn 21. september. Þar þarf að koma fram IS númer hests og símanúmer umráðamanns.

 

Skráningargjald fyrir hvert hross í videoupptöku er 3000 krónur.

 

Vonandi sjáumst við sem flest og seljum sem mest.

 

Hrossaræktarsamtök V-Hún

Félag hrossabænda A-Hún


13.09.2010 16:49

Rjúfum smitleiðir smitandi hósta í hrossum


Eftir Sigríði Björnsdóttur, dýralækni hrossasjúkdóma


Ítarlegar rannsóknir hafa nú leitt í ljós að smitandi hósti í hrossum stafar fyrst og fremst af bakteríusýkingu (Streptococcus zooepidemicus) í efri hluta öndunarfæranna, barka og jafnvel berkjum. Allur hrossastofninn hefur reynst næmur fyrir sýkingunni og ætla má að flest hross landsins hafi nú þegar smitast. Komið hefur í ljós að hross sem gengið hafa í gegnum veikina geta smitast á ný ef þau eru undir miklu smitálagi, þ.e. í snertingu við veika hesta eða í mjög smituðu umhverfi. Þetta bendir til  að hrossin myndi ekki öll fullnægjandi ónæmi gegn sýkingunni. Veikin mun því ekki ganga yfir í eitt skipti fyrir öll eins og þekkt er með sumar veirusýkingar, s.s. hitasóttina sem gekk yfir stofninn 1998. Við verðum þess í stað að læra að halda veikinni í skefjum og lágmarka það tjón sem af henni hlýst.  

Afar áríðandi er að hrossin fari eins frísk og auðið er inn í haustið og veturinn. Eigendur og umsjónarmenn hrossa þurfa að auka mjög eftirlit með hrossunum og þá sérstaklega folöldum og tryggja þeim meðhöndlun ef þörf krefur.

Með öllum ráðum þarf að varna því að nýr faraldur sjúkdómsins brjótist út þegar hross verða tekin á hús að nýju.

Veikir hestar (hóstandi og með litaðan hor) viðhalda smitinu og helsta smitleiðin er snertismit frá hesti til hests. Því er grundvallar atriði að hafa veika hesta aldrei innan um fríska og halda þá helst í nokkurri fjarlægð. Ekki verður með öllu hægt að komast hjá hættunni á óbeinu smiti en nú þegar veikum hestum fer fækkandi og mótstaðan eykst hægt og sígandi, verður sú smitleið ekki eins öflug og áður.

Helstu reglur:

Eins og áður hefur verið ítrekað, á að hreinsa og sótthreinsa öll hesthús áður en þau verða tekin í notkun með haustinu eða næsta vetur. Mikilvægt er að húsin hafi þornað vel áður en þau eru tekin í notkun að nýju. Nauðsynlegt getur verið að endurtaka þrif og sótthreinsun á húsum sem hreinsuð voru í vor ef þau hafa verið notuð í sumar.

Almenna reglan er sú að taka ekki hesta á hús nema þeir hafi verið einkennalausir í a.m.k. 30 daga og það sama eigi við um öll hross sem þau hafa komist í snertingu við í þann tíma. Ef taka þarf hesta inn vegna veikinda, s.s. hita eða annarra alvarlegra einkenna, þarf að finna hús þar sem ekki er hætta á að önnur hross smitist.

Þetta þýðir að menn verða að flokka hross í hópa eftir einkennum og/eða hættunni á að þau beri með sér smit.  Æskilegt er að hafa hrossahópa á útigangi ekki of stóra og almennt séð að hafa eins rúmt á hrossum  og frekast er unnt.

Nú eru hryssur að tínast heim úr stóðhestagirðingum og verður að líta á þær, folöldin og stóðhestana sem mögulega smitbera. Sama á við um ferðahesta og aðra hesta sem hafa verið fluttir til og hugsanlega komist í samneyti við veik hross eða verið í smituðu umhverfi. Þetta eru dæmi um hópa sem halda ætti sér þar til komið hefur í ljós hvort veikir hestar eru þar innanum. Sama á við um hross sem koma af fjalli í haust.

Hestar sem ætlunin er að selja, senda í tamningu eða þjálfun eða flytja af öðrum orsökum milli staða, þurfa að hafa tilheyrt sama einkennalausa hópnum í einn mánuð fyrir brottför til að draga úr líkum á að þeir beri veikina með sér. Hesta sem nota á í fjallferðir/göngur eða aðra haustbrúkun þarf nú þegar að halda með einkennalausum hestum til að tryggja eins og auðið er að þeir verði tilbúnir til þeirra nota.

Verði vart við hósta eða graftarkennt nefrennsli í hrossum á húsi ber að taka þau tafarlaust úr húsunum og koma þeim fyrir þar sem þau smita ekki aðra hesta. Hver og einn eigandi þarf að huga að aðstöðu fyrir veika hesta og sjá til þess að þeir hafi félagsskap af a.m.k. einu öðru hrossi. Séu einkennin væg og hestarnir í góðu standi fer væntanlega best um þá á útigangi við góðan aðbúnað, fóðrun og eftirlit. Að öðrum kosti þarf að veita veikum hrossum húsaskjól þar sem ekki er hætta á að önnur hross smitist. Gæta þarf ítrustu smitvarna við gegningar á veikum hrossum.

Matvælastofnun mun í samvinnu við Landssamband hestamannafélaga útfæra nánar smitvarnir í hesthúsahverfum. 

19.08.2010

F.h. Matvælastofnunar

Sigríður Björnsdóttir

dýralæknir hrossasjúkdóma

08.09.2010 22:20

Ævintýrið Skrapatungurétt 20 ára




Dagana 18. og 19. september verður mikið fjör í Austur-Húnavatnssýslu, stóðsmölun á Laxárdal og réttir í Skrapatungurétt og er þetta í tuttugasta skipti sem gestum er boðið að taka þátt í ævintýrinu. Verður ýmislegt til gamans gert í tilefni af þeim tímamótum. Gestir eiga þess kost að slást í för með gangnamönnum á eyðidalnum Laxárdal og upplifa alvöru þjóðlegt ævintýri.

Þátttakendur leigja hesta hjá heimamönnum eða mæta með sína eigin hesta. Stóðhrossin verða rekin til byggða á laugardeginum 18. september. Lagt er af stað frá Strjúgsstöðum í Langadal kl. 10. og síðan riðið sem leið liggur um Strjúgsskarð og norður Laxárdal. Athugið að aðstaða til að geyma hross nóttina fyrir smölunardag er við sandnámu við Strjúgsstaði  (norðari afleggjari). Þátttakendur eru beðnir að virða að ekki er leyfilegt að reka laus reiðhross í stóðsmöluninni. 

Við Kirkjuskarðsrétt á Laxárdal er hópurinn um kl 14. Þar hvíla hestar og menn og fá sér að eta og drekka eftir þörfum. Veitingar verða seldar á staðnum. Ráðgert er að leggja af stað kl. 16 frá Kirkjuskarði. Þaðan er riðið norður í Skrapatungrétt sem er ein myndarlegasta stóðrétt landsins. Gestir og heimamenn heillast ávallt af tignarlegu stóðinu. 

Ferðamannafjallkóngur líkt og í fyrri ár verður Valgarður Hilmarsson. Hann er heimavanur á þessum slóðum og mun sjá um fararstjórn og leiðsögn ferðamanna í stóðsmöluninni. Fyrir þá sem heldur vilja koma á bíl til að fylgjast með gangnamönnum og réttarstörfum, er rétt að benda á að Skrapatungurétt er í um 15 mín. akstursfjarlægð frá Blönduósi en fram að Kirkjuskarðsrétt er aksturstími um 40 mín.

Veitingar fyrir svanga smala og aðra gesti á Pottinum og Pönnunni Blönduósi. 

Á laugardagskvöldinu leikur besta stóðréttarhljómsveit landsins Paparnir fyrir dansi í Félagsheimilinu Blönduósi. Húsið opnar kl. 23:00. Barinn opinn. 18 ára aldurstakmark. 

 

Á sunnudagsmorgun hefjast réttarhöld í Skrapatungurétt um kl. 11. Bændur ganga í sundur hross sín og reka þau svo í lok dags til síns heima. Oft finna karlar og konur sinn draumagæðing í smalamennskunni eða í réttunum.

Stóðréttarhelgi Skrapatunguréttar er hátíð heimamanna og ferðafólks þar sem er spilað, sungið og skemmt sér að sið Íslendinga.

Allir gestir eru hjartanlega velkomnir. Nánari upplýsingar um þjónustu hjá ferðamannafjallkóngi í síma:  893 2059 (eftir kl. 18 á virkum dögum) eða í netfangi vallih@centrum.is.   

Húnahornið

  • 1
Flettingar í dag: 131
Gestir í dag: 45
Flettingar í gær: 122
Gestir í gær: 59
Samtals flettingar: 2328356
Samtals gestir: 345221
Tölur uppfærðar: 16.10.2019 19:26:26

Vafraðu um

Eldra efni

Um hestamannafélagið Neista

Nafn:

Hestamannafélagið Neisti

Afmælisdagur:

1943

Heimilisfang:

540 Blönduós

Staðsetning:

Blönduós

Um:

Harpa Birgisdóttir, formaður, Magnús Sigurjónsson, Kristján Þorbjörnsson, Sonja Suska, Berglind Bjarnadóttir. - - - Hestamannafélagið Neisti hefur sitt aðsetur á Blönduósi, en er félag hestamanna í Austur-Húnavatnssýslu.

Kennitala:

480269-7139

Tenglar

clockhere