Hvað eru hnjúskar ?

Umræða hefur verið um hnjúska í hrossum vegna tíðarfarsins undanfarið og heyrst hefur um hesta sem hefur orðið að taka á hús vegna þessa.  En hvað eru hnjúskar og hvers vegna myndast þeir? Eftirfarandi er tekið af einum hestavefnum:

"Á haustin auka fitukirtlar húðarinnar í hrossunum framleiðslu sína til að feldurinn hrindi betur frá sér vatni. Stundum eykst starfsemi fitukirtlana það hratt að þeir ná ekki að losa innihaldið á yfirborðið, heldur stíflast. Þá myndast hnjúskar. Þeir myndast sérstaklega mikið þegar hross lenda í mikilli rigningu og svo frosti strax á eftir. Þess vegna er meira um hnjúska á suðurlandi en annars staðar, enda vætumeira þar.

Út frá hnjúskunum geta komið sár og sýkingar í húðina. Þá eiga hrossin erfiðara með að halda á sér hita og leggja af, enda fer meiri bruni næringarefna í að halda þeim heitum. Besta ráðið er að koma hestum sem eru mikið hnjúskaðir á hús til að varna því að þeir leggi af. Yfirleitt myndast einn og einn hnjúski á hrossum á haustin og er það ekki til að hafa áhyggjur af, amk. ekki á meðan þeir eru mjög fáir. Til að losna við hnjúskana sem fljótlegast er hægt að þvo sárið með volgu soðvatni og losa smám saman um fituna. Þeir hverfa fljótlega sé það gert. Ekki er ráðlegt að ríða út á hesti sem er mikið hnjúskaður, því hnjúskarnir verða þá eins og litlir steinar á milli manns og hests."